Páskafrí og páskar 2009

Það þarf áreiðanlega ekki að taka það fram að við fjölskyldan áttum dásamlega notalegt páskafrí saman og einstaklega ánægjulegan páskadag! Páskarnir eru svo frábær hátíð, mikið frí, lítið stress og vor í lofti! Ég komst að því mér til mikillar ánægju að ég á páskamyndaalbúm frá hverjum einustu páskum síðan ég byrjaði að halda úti þessari síðu og yfirleitt hafa einmitt þessi albúm verið í miklu uppáhaldi enda tengjast þau alltaf afslappaðri fjölskyldusamveru, vorblómum og miklu súkulaðiáti! Árið í ár var engin undantekning!

Í dymbilviku

María og Hugi voru í páskafríi vikuna fyrir páska og við áttum afskaplega notalega daga saman hér heima á Konsulentvägen. Einar var þó fjarri góðu gamni til að byrja með enda fyrst í vinnunni og síðar í örheimsókn á Íslandi til að vera viðstaddur jarðarför ömmu sinnar. Við hin slógum þó á hvers kyns pabba- og langömmusöknuð með öflugri föndurstund við eldhúsborðið á miðvikudeginum.

Verkefni dagsins var að mála og útbúa agnarsmáar páskanornir! Ég hef áreiðanlega tjáð mig um það áður á þessum vettvangi en ég hef aldrei alveg náð þessum sænsku páskanornum! Þjóðtrúin segir sem sagt að á skírdegi fljúgi nornirnar á kústunum sínum til Blåkulla (sem ég held að sé fjall en María segir að sé eyja) og halda veislu með djöflinum. Ég er ekki alveg að ná tengingunni við páskana en hvað sem öllu líður eru páskanornirnar afskaplega saklaus fyrirbæri í nútíma Svíþjóð og helst að þær verði á vegi manns sem litlar stelpur með skuplur að sníkja nammi og útdeila páskakortum ... nú eða sem litlar krúttlegar trékerlingar hér á Konsulentvägen.

Og hér er afraksturinn! Þetta eru Maríu nornir, sætar og fínar.

Og hér eru Huga verkefni. Hann vildi reyndar ekki gera nema eina páskanorn og tók sjálfstæða ákvörðun um að gera unga og hana úr hinum tréfígúrunum.

Og hér eru mínar þrjár. Ég var eiginlega stoltust af kústunum, það var allra erfiðast að finna út úr því hvernig gera ætti þá svo vel væri en með málaðri eldspýtu, snæri og fljótþornandi lími hafðist þetta!

Eftir páskanornirnar var ég kominn í mikinn föndurham og ákvað að reyna að útbúa smá blómaskreytingu með gulum hyacintum sem ég hafði keypt mér. Stakk þeim ofan í sæta kaffibolla sem ég átti, klippti nokkrar greinar úr garðinum og vafði smá hreiður með aðstoð blómavírs, stakk nokkrum pílvíðargreinum með og kórónaði allt með þessum dúnmjúku fuglum sem ég fékk fyrir þarsíðustu páska. Ég var ægilega stolt af afrakstrinum og hugleiddi um tíma að skipta bókmenntafræðinni út fyrir feril í blómaskreytingum!

Skírdagur

Á skírdegi fór María í hefðbundinn páskanornaleiðangur ásamt nokkrum vinkonum sínum. Hér er hún að leggja í hann með fínu páskakortin í töskunni og svuntuna, skupluna og freknurnar á sínum stað!

Við vorum svo heppin nokkru síðar að fá einmitt þennan páskanornahóp í heimsókn til okkar. Frá vinstri: María, Felicia, litla systir Feliciu, Linnea og litli bróður Linneu.

Skömmu síðar komu Tuva og Bjarki við hjá okkur ásamt vinkonum sínum og drógu Huga með sér í leiðangur. Hann var reyndar svolítið feiminn við að fara í búninginn en við tjáðum honum að hann færi hvergi nema með hatt, í jakka og með ámálað skegg en einhvern veginn þannig eru flestir strákar klæddir við þetta tilefni. Á endanum lét hann til leiðast og lagði af stað með öll fínu páskakortin sín sem hann var svo stoltur af. Hann vildi hins vegar sem minnst sjást á myndunum sem við tókum þegar þau voru að leggja í hann!

Föstudagurinn langi

Ég er ansi hrædd um að við höfum ekki tekið föstudaginn langa mjög alvarlega að þessu sinni því einmitt þann dag völdum við til þess að mála eggin okkar! Við höfum raunar ekki blásið úr eggjum og málað frá árinu 2006 svo þetta var löngu orðið tímabært. Árið 2007 eyddum við páskunum í Hollandi og í fyrra notuðumst við bara við gömlu eggin okkar sem merkilegt nokk tókst að flytja óbrotin milli landa! Við vorum hins vegar öll farin að sakna þessarar skemmtilegu fjölskylduhefðar og því kom ekki annað til greina en að skreyta egg í ár enda tókst mér að brjóta allt of mörg af gömlu eggjunum í fyrra þegar ég tók skrautið niður (alveg merkilegt miðað við að það tókst að koma þeim heilum yfir hafið!).

Og hér hangir afraksturinn á kirsuberjagreinum!

Hugi gerði þessi þrjú ...

... Einar gerði þessi ...

... þetta eru mín egg ...

... og María á heiðurinn að þessum þremur!

Nokkrir svona krúttlegir ungar fengu svo að fylgja með á kirsuberjagreinunum.

Við höfðum svo geymt síðustu tréfígúruna handa Einari sem bjó þessa fínu páskanorn til á föstudaginn langa.

Laugardagurinn fyrir páska

Daginn fyrir páska var dásamlegt veður, glampandi sól og 18° hiti. María fór til vinkonu að leika en Hugi skemmti sér í garðinum og tréhúsinu. Það er alltaf svolítið skrýtið þegar þessir hlýju dagar koma fyrst á vorin og manni líður eins og maður hljóti að vera eitthvað ruglaður að vera á stuttermabol og berfættur þegar grasið er enn sinugult og ekki grænt lauf að sjá!

Við drógum fram hjólin og rifjuðum upp gamla takta. Komumst líka að því að Hugi þarf nauðsynlega að eignast stærra hjól sem allra fyrst!

Páskadagur

Ég held ég hafi sagt frá því áður að eftir öll mín ár í Mótettukórnum þar sem vakna þarf eldsnemma á páskadagsmorgni til að syngja tvær messur og borða svo himneskan páskamorgunmat saman þess á milli þá þykir mér eiginlega hin raunverulega hátíð vera um morguninn og legg mest upp úr góðum morgunverði á páskunum! Hér eru systkinin vöknuð og bíða spennt eftir veitingunum.

Og ég verð að segja að í ár vorum við með besta morgunmat sem hægt er að hugsa sér, heimabökuð pain au chocolate með súkkulaði, appelsínu og möndlumassa! Ég held mögulega að ég hafi aldrei smakkað neitt jafn gott! Ég borðaði a.m.k. svo mikið að ég fékk sykursjokk á eftir og var með hjartslátt í nokkra klukkutíma!

Hugi útdeildi páskakortum sem hann var búinn að föndra sjálfur með mikilli leynd!

Þrenns konar áletranir voru í boði, hver annarri yndislegri! Inni í kortunum voru svo ýmsar myndir af ungum, páskanornum og hérum.

Sæta páskastelpan sem fæddist á páskadegi fyrir rétt tæpum níu árum síðan.

Páskastrákur með kakóskegg.

Ég má svo til með að birta hér myndir af páskaskreytingunum í blóma. Ég hef aldrei áður séð gular hyacintur en mun hafa augun opin eftir þeim fyrir alla framtíðarpáska.

Svo var það páskaeggjaleitin! Páskahérinn hafði nefnilega komið í heimsókn til okkar um nóttina og dundað sér við eitt og annað meðan við vorum sofandi, meðal annars hafði hann falið egg barnanna og skilið eftir vísbendingar. María og Hugi voru alveg til í að kaupa söguna um páskahérann og hófust glöð handa við eggjaleit.

Leikurinn barst um víðan völl, meðal annars inn í ísskáp ...

... inn í sjónvarpsherbergi ...

... undir sófa ...

... og lauk svo að endingu í þvottahúsinu þar sem eggin fundust inni í þurrkskáp (í Svíþjóð eiga allir húseigendur eigin þurrkskáp, svona eins og er bara til á leikskólum á Íslandi).

Eggin fundin og síðasta kveðjan frá páskahéranum lesin.

Stóra stundin runnin upp og allir mjöööög glaðir!

Hugi óskaði sérstaklega eftir að ég tæki mynd af hananum að borða konfektmola.

Veðurblíðan hélt áfram á páskadag og Einar skrapp á náttsloppnum út á pall í morgunsárið. Slíkt hefði verið óhugsandi fyrir bara nokkrum dögum síðan þegar enn var snjór og frost.

Ég komst að því þegar ég opnaði páskakassann minn að ég hafði brotið mun færri egg en mig minnti þarna í fyrra. Ég bað Einar því að klippa eina grein af plómutrénu og hengdi gömlu eggin á hana og stillti upp í eldhúsinu.

Eftir morgunverðinn lögðum við Einar okkur aðeins aftur enda höfðum við vakað allt of lengi frameftir við súkkulaðibrauðagerð og páskahéraskriftir. Um að gera að nota síðustu vikurnar sem maður getur enn leyft sér þann munað að leggja sig þótt börnin séu í fullu fjöri! Í hádegisverð bauð Einar svo upp á nýbakaðar bollur.

Síðdeginu eyddum við úti í sólinni og Hugi lék sér með bíl á pallinum ...

... eða sparkaði fótbolta fyrir framan hús. María vildi heldur sitja uppi í tréhúsi og lesa Syrpu.

Þessa krókusa settum við niður síðasta haust og njótum afraksturins nú.

Á páskadegi var ég komin akkúrat 31 viku og tími fyrir næstu kúlumynd. Ég er alveg meðvituð um að þessi stórmynstraði kjóll er ekki alveg að gera sig en nennti ómögulega að skipta bara fyrir myndatökuna. Og trúið mér, hin hliðin var mun verri!

Við höfðum sömu páskasteik og í fyrra, innbakað hreindýrafillet með villisveppum. Kannski meiri haustblær yfir því en vor en þetta er bara svoooo gott! Einar sá um smjördeigsskreytingarnar í ár og valdi póstmódernískan stíl! Er þetta rusl ... er þetta skraut?! Enginn veit!

Steikin skorin!

Eftir kvöldverðinn horfðum við á síðasta þáttinn í syrpunni um Merlin sem var að vonum æsispennandi! Ég veit ekki hvort þessir þættir hafa verið sýndir á Íslandi en ef að því skyldi koma þá mælum við fjölskyldan heilshugar með þeim, hér hefur ekki mátt missa af einum einasta þætti! Eftir Merlin var svo súkkulaðikaka og kaffi í eftirrétt, A Little Trip to Heaven svíkur aldrei! Það var því södd og sæl fjölskylda sem lagðist til svefns á páskadag ... og glöð að eiga einn frídag inni í viðbót! Á annan í páskum vorum við hins vegar voða mikil retro-fjölskylda, Einar smíðaði allan daginn og ég sat við saumavélina og fjöldaframleiddi sængurgjafir svo því miður eigum við engar myndir frá þeim annars ágæta degi!

Eins og ég sagði í upphafi komst ég að því að á þessari síðu má finna páskaalbúm fjölskyldunnar allt frá árinu 2003, hvert öðru kærara. Hér eru þau:

Páskar 2008

Páskar í Hollandi 2007

Páskar 2006

Páskar 2005

Páskafrí 2004

Páskar 2003