Páskafrí

Þá er komið langþráð páskafrí hjá heimilismönnum á Bárugötu! Frídagarnir hafa verið vel nýttir og ýmislegt verið gert sér til dundurs enda vor í lofti og ekki annað hægt en að vera kátur og hress!

Á Skírdegi var byrjað á að útbúa páskaskraut. Einar blés úr einum tíu eggjum sem við máluðum svo á með vatnslitum. María var öflugust og sá til þess að helmingur eggjanna varð fagurlega litskrúðugur.

Hugi var líka ansi myndarlegur en mamman heimtaði reyndar að aðstoða, svona til að eggin færu örugglega ekki til spillis.

Skrautinu komið fyrir á sínum stað!

Eru ekki páskagreinarnar okkar glæsilegar?!!

Hugi málaði þetta egg!

Og þetta var skreytt af húsmóðurinni!

Og þetta gerði María. Þar sem Einar var orðinn fjólublár í framan af blæstri komst hann aðeins til að skreyta eitt egg ... og því miður hefur ekki þótt ástæða til að mynda það!!!

Á Föstudeginum langa var sofið út en svo fengum við okkur indælan morgunverð. Hér sjást systkinin að snæðingi.

Síðan var haldið í Húsdýragarðinn. Hér er Hugi að fá sér hressingu þar.

Og stóra systir líka!

Þarna fengum við Einar það allra versta kaffi sem við höfum á ævi okkar drukkið ... ég ræð ykkur eindregið frá því að sannreyna hvort ykkur finnst það líka!!!

Samkvæmt eindreginni ósk heimasætunnar var farið í hringekjuna. Eins og sjá má féll það í kramið!

Þarna erum við á leiðinni að skoða hreindýrin. Mía María (dúkkan hennar Maríu) fékk að koma með í kerrunni sinni.

Þarna erum við Hugi að kíkja á hreindýrin ... mér finnast þau einna skemmtilegust!

Og við mæðgurnar ... María með svip!

Og að lokum er svo ein af rebba sem fékk sér blund þarna á „mörg steinar“, eins og Hugi orðaði það!