Páskar 2005

Við á Bárugötunni erum búin að eiga frábæra páska! Við tókum „einungis“ 200 myndir í páskafríinu, hér er því aðeins lítið brot af þeim til að sýna ykkur hinum hvað á daga okkar hefur drifið!

Dymbilvikan

Við skreyttum sérstaklega mikið fyrir páskana þetta árið. Afskorin blóm og smáfuglar voru í aðalhlutverki ... hér er einn sætur sem situr á túlípanavendi!

Þessi situr á kínagullsgrein og er líka sætur ...

... en þessi er náttúrulega bara sætastur!!! María kom heim með hann af leikskólanum og þykir okkur í fjölskyldunni hann óumræðilegt krútt. Hann er úr þæfðri ull og lítur dálítið rytjulega út, goggurinn er nokkrum númerum of stór og fæturnir líka. Allt þetta gerir hann algjörlega ómótstæðilegan!!!

Skírdagur

María og Hugi nývöknuð á skírdagsmorgni! Hugi með dúkkusnuð og stóra systir hans horfir á í forundran! Hann er sko löngu hættur að nota svona smábarnadót en fannst greinilega eitthvað freistandi að rifja upp gamla takta!!!

Kominn í náttkjólinn hennar Maríu og með kórónuna hennar á kollinum ... og finnst hann flottur!!!

Þrjár stórar og fallegar bóndarósir voru líka hluti af páskaskrautinu okkar þó túlípanar, páskaliljur og kínagull hafi einnig verið áberandi í ár!

Páskadagsmorgunn í kirkjunni

Á páskadegi syngur Mótettukórinn tvær messur, klukkan 8 og klukkan 11. Milli þeirra er dásamleg páskaveisla þar sem borðin svigna undan kræsingum, súkkulaði à la Erla Elín er þambað í lítra vís, leitað er að páskaeggjum og málshættir eru á hvers manns vörum. Hér er fyrri messan búin og nokkrar vaskar kórstúlkur sjást koma girnilegu brauði og kökum fyrir á hlaðborðinu.

Halldís og borðið. Mikið var af heimalöguðum veitingum en marhnútasalat Bjargar vakti verðskuldaða eftirtekt!

Í þetta indæla litla páskaboð bjóðum við kórmeðlimir svo fjölskyldum okkar. Amma Imba, Einar, María og Hugi létu sig ekki vanta frekar en fyrri ár. Fyrsta árið mitt í kórnum vorum við reyndar fjarverandi enda fæddist María um svipað leyti og klukkurnar hringdu út síðari messuna. Páskadagur er því svona „aukaafmælisdagur“ hjá henni!!!

Hugi fékk sér heitt súkkulaði (ath. þetta er EKKI kakó!!!).

Þegar flestir eru orðnir mettir er farið í málsháttaleik. Hver skrifar einn málshátt niður á blað og stingur í stóra körfu. Einstaklega vinsælt er að semja persónulegar útgáfur af þessum gömlu góðu og jafnvel snúa upp á kórinn eða kórstjórann! Þegar allir hafa skilað af sér málshætti gengur karfan á ný og hver og einn dregur sér málshátt og les svo upphátt fyrir hina. Una og Þröstur áttu óvæntasta, yndislegasta og sætasta smell ársins ... og sýndu hvers kórinn er megnugur þegar hann lætur til sín taka!!!

Tvö með 5. des. syndrómið!!! Syndrómið vill loða við fólk sem fætt er þann annars ágæta dag, 5. desember og lýsir sér meðal annars í því að þeir sem af því þjást myndu sennilega gleyma hausnum á sér einhvers staðar ef hann væri ekki skrúfaður fastur á þau!

Eva, Halldís og Arngerður gerðu súkkulaði, bollum og kökum góð skil. Eva og Arngerður voru báðar nýkomnar frá London þar sem þær héldu uppi stuðinu á Stuðmannatónleikum og hafa væntanlega báðar sungið fagurlega með.

Að loknum málsverði er páskaeggjaleit fyrir börnin inni í kirkjunni sjálfri. Sverrir formaður útskýrir leikreglur og mundar körfurnar meðan þátttakendur setja sig í viðbragðsstöðu! Einn, tveir og þrír!!!

María gefur sér smá tíma til að sitja fyrir áður en haldið er af stað í páskaeggjaleitina.

Leita, leita, leita ....

... Hugi er búinn að finna eitt egg ...

... og þá þarf að hlaupa með það í körfuna!!!

Páskadrengur og páskastúlka!

Hugi týndist að lokinni páskaeggjaleit og eftir örvæntingarfull hlaup um kirkjuna fannst hann loks á þessum stað! Þetta er ævintýramaður mikill eins og Leifur heppni!!!

Stóra systir kemur til bjargar!

Svo mátti loksins borða páskaeggin sem fundust inni í kirkjunni. María stóð sig vel í þessu öllu saman las hátt og snjallt upp þann málshátt sem hún dró úr körfunni (Asninn þekkist á eyrunum) en áður hafði hún samið sinn eigin málshátt sem svo skemmtilega vildi til að Imba amma dró. Hann hljóðaði svona: Bursta tennur á hverjum degi!!! Ekki veitir af á þessum síðustu og verstu tímum óteljandi páskaeggja, brjóstsykra og karamella!!!

Hugi og mamma skoða páskaeggið.

Freyja kom auðvitað líka í páskaboðið og var sætust ... en við á Bárugötunni vitum auðvitað allt um það! Það glittir líka í Gunna á myndinni en ef þið sjáið hann ekki nógu vel þurfið þið bara að ímynda ykkur Freyju með skegg og gleraugu og þá vitið þið hvernig hann lítur út!!!

Eftir frábæran morgunverð í kirkjunni þurfti að æfa lítillega fyrir seinni messuna. Hugi fylgist með kórnum af áhuga.

Páskadagur á Bakkastöðum

Í eftirmiðdaginn kom fjölskyldan saman hjá Imbu ömmu á Bakkastöðum. Yngstu fjölskyldumeðlimirnir nutu góða veðursins úti í móa. Hrappur frændi situr, Emil, Hugi og María standa fyrir framan Gunndísi stóru frænku.

María með kúnstir úti í móa.

Hugi á hlaupum.

Pála er, enn sem komið er, ynsti fjölskyldumeðlimurinn. Hún er bara sex mánaða en er samt farin að skríða og standa upp ... eins og myndin ber með sér!

Sigrún og Bjartur! Hafi Una og Þröstur átt smellinn í páskaboðinu um morguninn voru það Guðmundur og Sigrún sem áttu skemmtilegasta útspilið í þessari veislu!!!

Hrappur bíður spenntur eftir páskalambinu.

Nýir skór!!! Mig vantaði þá víst!!!

Hugi borðar meira páskaegg, Hrappur í baksýn!

Bjartur var mesta krúttið og lék við hvern sinn fingur þegar hann var aðeins búinn að ná áttum á nýjum stað innan um nýtt fólk!

Annar í páskum

María og Hugi byrjuðu daginn á páskeggja- og sælgætisáti. Hugi var kominn í mikinn ham stuttu seinna!!! Þarna er hann á leiðinni í bæinn að eigin sögn en heldur er hann undarlega klæddur til slíkra ferða?!!

Ekkert varð úr bæjarferð en við skelltum okkur þó út að hjóla. Það kostaði þraut og pínu að fá Huga til að vera með hjálminn en hann samþykkti að lokum eftir stífar samningaviðræður!

Hugi á fleygiferð ...

... María á fleygiferð!

Mæðgur í páskaskapi.

Krúttlegasti baksvipur í heimi!!!

María fékk að fara í heimsókn til skólasystur af Drafnarborg en feðgarnir nýttu tímann til vorverka í garðinum, klipptu runna og hreinsuðu beð.

Grænt hús, grænn jakki, annar grænn jakki, grænir vettlingar, grænkandi gras og sætir feðgar í „grænu“ skapi.

Kátur og knúsaður!

Inni fengum við okkur huggulegan hádegisverð, nýbakaðar bollur, illa lyktandi osta og ískaldan skyrdrykk. Það gerist ekki mikið betra!

Við Einar sökktum okkur ofan í sænskar glæpasögur í páskafríinu. Einar las Ett fruset liv eftir sænska lækninn Karin Wahlberg sem hélt fyrirlestur um bókina á ráðstefnunni sem við sóttum í Gautaborg síðastliðinn nóvember. Hann er farinn að huga að væntanlegum Svíþjóðarflutningum fjölskyldunnar og æfir sænskuna með bóklestri en ég læt mér nægja að lesa enskar þýðingar. Enn held ég tryggð við Henning Mankell sem skrifar um spæjarann Kurt Wallander. Ég held bara að ég sé skotin í Wallander sem þó er fimmtugur, þunglyndur og með sykursýki!!!

Er samt alltaf skotnust í Einari!!!

Við vonum að þið hafið öll átt eins ánægjulega og notalega páska og við á Bárugötunni!

Gleðilega páska!