Piparkökubakstur 2005

Síðustu helgi tók Bakkastaða/Bárugötufjölskyldan sig til og bakaði piparkökur eins og vindurinn! Við settum upp vinnubúðir á Bakkastöðum og kepptumst við frá föstudagseftirmiðdegi til laugardagskvölds, nánast samfleytt!

Meðan kökurnar bökuðust í ofninum lærði Hugi að skrifa stafinn sinn, „H“. Eins og sjá má á fyrri myndinni tókst honum einkar vel að fylgja fyrirmælum móður sinnar (strik niður, annað strik niður og strik á milli!) og var óskaplega stoltur af sjálfum sér. Á síðari myndinni stendur hann yfir stílabókinni og dáist að handbragðinu!

Tvær plötur komnar úr ofninum. Fjölbreytnin í formum hefur sjaldan verið meiri en í ár!

Framlag Einars til piparkökubaksturinn var að elda dýrindis kvöldverð ofan í kökugerðameistarana ...

... nautasteik með heimalöguðu pestói og kartöflum úr garðinum á Bakkastöðum! Mmmmmm ... !

Eldurinn logaði glatt í arninum og skapaði notalega stemmningu í ömmuhúsi.

Amma er meistari í að fletja deigið út!

María gæddi sér á ís á meðan kökurnar bökuðust ...

... en bróðir hennar gluggaði í blöðin!

María var þó liðtæk í bakstrinum eins og sannri heimasætu sæmir.

Þegar búið var að fletja deigið út, búa til kalla og kellingar og baka svo í ofninum settumst við niður með kaffibolla og spjölluðum. Eftir það skelltum við Einar okkur heim en systkinin fengu að vera í vellystingum hjá ömmu til næsta dags.

Á laugardeginum var hafist handa við að skreyta piparkökurnar. Hugi og María tóku hlutverk sitt alvarlega og smurðu litríkum glassúr á kökurnar alvarleg á svip!

Hugi kom á óvart með öflugri þátttöku sinni en í fyrra sýndi hann skreytingunum lítinn áhuga! Í ár kepptist hann hins vegar við allan liðlangann daginn ... milli þess sem hann kíkti í dagblöð heimilisins!

María hefur hins vegar fyrir löngu sýnt yfirburðahæfileika sína í piparkökuskreytingum og því kom okkur ekkert á óvart að hún skyldi senda frá sér hvert listaverkið á fætur öðru!

Daman við nokkrar af sínum kökum.

Í miðjum klíðum heimsótti okkur kisukrútt ...

... sem vildi gjarnan fá að leika sér við kattardýrin á heimilinu!

Hér gefur að líta hluta af framleiðslu mömmunnar þetta árið!

Eins og vanalega voru brjóst og rassar vinsælt skreytingaefni!

Það er alltaf jafnvinsælt að halda jólin á Kanarí! Þessi er búin að vera í löngu fríi þar og hefur tekið hressilegan lit!

Fuglaflensan kemur til landsins!

Hvor haldið þið að sé góði tvíburinn og hvor vondi?!

Jólalegur skúrkur.

Og það er fátt jólalegra en villigeltir!

Og svo voru víst einhverjar alvöru jólalegar piparkökur inni á milli!

Maríu kökur voru alveg glæsilegar. Hér má sjá foreldra hennar!

Er þetta engill? Er þetta trúður? Það veit enginn nema listamaðurinn sjálfur!

Þessi finnst mér svo sætur!

Og hér er sjálfsmynd listakonunnar!

Hér má sjá brot af afrakstri Huga. Hann var dálítið mikið fyrir að velja sér bara einn lit og halda sig við hann góða stund en eftir því sem leið á daginn gerðist hann sífellt djarfari í litavali!

Elli mætti seint og um síðir og náði að skreyta nokkrar góðar með okkur.

Hann gerði m.a. þennan dónalega flassara-engil!

Þessi var líka flottur hjá honum!

Og Elli gerði líka þessa ótrúlega nákvæmu eftirmynd af kraftajötninum O.D. Wilson sem er mörgum í fersku minni!

Sjálf stóð ég fyrir nýju þema þetta árið: Jól um víða veröld! Hérna fagnar Boris Rostokovitsj jólunum í Rússlandi ...

... og Nao Gong í Kína. Ég sé að ég hef alveg gleymt að taka mynd af Lord Ashcroft í Englandi og Wilmu Jones frá New Orleans!

Hinn alíslenski Jói Fel er hins vegar tákngervingur jólahátíðarinnar hér á Fróni.

Einmitt þegar ég var við það að leggja lokahönd á þessa Unnar Birnu piparköku bárust þær fregnir upp á Bakkastaði að hún hefði skömmu áður verið kjörin Miss World. Ég smellit því kórónunni á hana til að fanga tíðarandann enn betur!

Að sjálfsögðu var svo ein Einars-kaka en hann var reyndar fjarri góðu gamni þegar glassúrmótið fór fram. Meðan við skreyttum og lituðum var hann í góðu stuði á Kleppi ... eins og sjá má á piparkökunni!

Hugi sæti virðir kökurnar fyrir sér í lok dags.

María sæta var líka ánægð með þetta allt saman.

En Bakkastaðamæðginin voru bara skrýtin!!!

Piparkökur ársins 2004

Piparkökur ársins 2003