Þegar piparkökur bakast

Það er árleg hefð hjá okkur að baka piparkökur með ömmu á Bakkastöðum. Laugardaginn 11. desember var því hafist handa! María og Hugi tóku fullan þátt í kökugerðinni enda bakaradrengir miklir!

Hugi var klár í slaginn með svuntu og allt!

María mundar formin!

Og á meðan á öllu þessu stóð skrifuðu ritgerðirnar mínar sig sjálfar! Alveg ótrúleg tæki þessar fartölvur!

„Svo fletur þú út deigið á pönnuna ... svona já ... svona!“

Við vorum í fæði að Bakkastöðum þessa helgina enda kokkur heimilisins á kafi í vinnu.

Og undir kvöld voru tilbúnar þessar líka fínu kökur. Enginn tími gafst hins vegar til að skreyta þær þann daginn ...

... og því var brunað aftur á Bakkastaði á sunnudeginum og marglitum glassúr smurt á hverja köku. Bakaradrengirnir og Hérastubbur bakari sjást hér önnum kafnir!

María stóð sig fádæma vel í skreytingunum og eftir hana liggja fjölmörg listaverk. Hún vann baki brotnu í marga klukkutíma af slíkri eljusemi að móðirin átti ekki til orð. Ljóst er að þetta hefur daman í beinan kvenlegg enda mamma hennar, amma og langamma allar miklir piparkökubakarar!

Eftir Huga liggur hins vegar u.þ.b. ein kaka! Þetta hefur hann augljóslega í beinan karllegg enda lætur Einar sig yfirleitt vanta á þessar miklu baksturs- og skreytisamkomur! Hann fær kannski bara að vera með pabba sínum í vinnunni að ári?

Amma á Bakkastöðum var að sjálfsögðu kappsfull í skreytingunum enda eru þær teknar mjög alvarlega á þessum bænum.

María og Hugi fengu jólasveinahúfur sem vöktu mikla lukku!

Nokkrar kökur tilbúnar ...

... og fer sífellt fjölgandi.

Nokkrir glaðlegir snjókallar!

Kisubörnin kátu.

María stóð sig ekki lítið vel og hér má sjá örlítið brot af glæsilegum afrakstri hennar.

Eins og einhverjir vita þá hefur skapast sterk hefð fyrir jaðarskreytingum innan fjölskyldunnar okkar! Sívinsælt þema piparkökuskreytinga er t.d. Jól á Kanarí. Þetta er veruleiki sem margir Íslendingar þekkja og jafnstór hluti af hátíðahaldinu hjá sumum og Oslóartréð á Austurvelli. Hingað til hafa slíkar ferðir þó gjarnan verið flokkaðar sem lágmenning en við höfum tekið það upp á okkar arma að flytja Kanaríferðirnar inn að miðju menningarinnar með því að heiðra þær með einstökum piparkökuskreytingum! Takið sérstaklega eftir naglalakkinu hjá þessari dömu!

Sérstakt afbrigði af Jón á Kanarí-þemanu er Nektarnýlenduþemað sem einnig er vinsælt frá ári til árs. Hér er slík skreyting í penari kantinum enda glæsilegur hárvöxtur látinn hylja viðkvæmustu staði! Við erum þó sjaldnast svo tepurleg! Það er kannski rétt að taka það fram að upphaflega stóð til að þessi kaka væri Bangsímon og sú að ofan Grislingur vinur hans!

Yfir hverju skyldi þessi John Holmes vera svona kátur?!

Krókódíll að bíta grandalausan kokk ... þessir falla í Freestyle-flokkinn. (Báðir eru gerðir úr snjóakallamótum ... reyndar svindlaði ég smá með krókódílinn og braut pínulítið stykki af honum svo dæmið gengi upp ... það er samt eiginlega alveg bannað!)

Á hverju ári verður að gera a.m.k. eitt sett af Ólafi og Dorrit. Reyndar misheppnaðist Óli greyið eitthvað aðeins í framleiðslu en við getum bara sagt að það hafi stór fluga sest á nefið á honum!

Í ár kom America's Next Top Model þemað sterkt inn. Shandi er önnur frá vinstri ... þetta er áður en hún hélt fram hjá kærastanum og þess vegna er hún svona glöð!

Annað nýtt þema var Jólalínan frá Victoria's Secret. Með stórauknum Ameríkuferðum Íslendinga sem leita upp ódýran varning í vestri skömmu fyrir jól, er rétt að halda á lofti eitthvað af þeirri vöru sem hvað vinsælast er að draga upp úr töskunum eftir slíkar reisur.

Þessi er ekki alveg nógu politacally correct en fær samt að fljóta með til heiðurs bókmenntaverkum á borð við Litla svarta Sambó og Tinna í Kongó.

Soul-band með afrógreiðslu (þeir eru til margs nýtilegir snjókallarnir!).

Nýtt inn á lista þetta árið var þemað Jól á Mars. Það gerði sér ekki lítið fyrir og skaust beint í efasta sætið þó við séum hér að tala um algjörar jaðarskreytingar enda efnið komið vel út fyrir mannheima.

Þetta þema naut gífurlegra vinsælda enda engin ástæða til að gera lítið úr jólahaldi þeirra Marsbúa.

Svona til að enda þetta á jákvæðu nótunum kemur hér ein ástarpiparkaka. Af einhverjum ástæðum getur Einar aldrei verið með í piparkökuskreytingunum. Honum til heiðurs skreyti ég því ævinlega einn stóran og veglegan piparkökukall. Hér er horft í öll smáatriði og m.a.s. má sjá glitta í nýja palminn hans Einars upp úr vasanum. Reyndar er ákveðin fölsun í gangi varðandi bringuhárin ... þetta er bara óskhyggja í mér! Sumir kjósa kannski að tileinka elskhuganum lög eða jafnvel heilu plöturnar en hjá mér er piparkakan tákn um eilífa ást ... Einar, ég elska þig!

Piparkökubakstur síðasta árs