Hugi verður fimm ára 

Þann 7. janúar 2007 varð Hugi Einarsson fimm ára gamall! Þetta var langþráður dagur enda bíður drengurinn spenntur eftir að verða fullorðinn og geta eldað mat eins og pabbi og unnið á „heimslugæslustöð“. Eins og vanalega hófst afmælisdagurinn með heitu kakói og afmælispökkum.

Afmælisstrákurinn og afmælissystirin vöknuðu eldsnemma enda merkisdagur í uppsiglingu. Meðan foreldrarnir hituðu kaffi og kakó komu þau sér þægilega fyrir vafin inn í flísteppi og biðu eftir fjörinu. María minnir hér dálítið á cousin It úr Addamsfjölskyldunni!

Það var óskaplega kátur fimm ára strákur sem kúrði sig þarna í sófanum!

Kakóið komið í Mysingsbollann (Hugi kallar Snabba úr Múmínálfunum Mysinginn, væntanlega vegna litarhaftsins!) og Hugi farinn að bjástra við að opna fyrsta pakkann. Þessi var frá ömmu Imbu.

Og upp úr honum komu þrjár Harry Potter spólur, Huga til mikillar gleði!

Hugi virðir góssið fyrir sér glaður á svip!

Þá er það pakkinn frá Kötu ömmu, hvað skyldi vera í honum?

Töffara dúnvesti!!! Hugi lítur mikið upp til stráks á leikskólanum sem heitir Ludvig, álítur hann eins konar tískulöggu því hann vill helst klæðast fötum nákvæmlega eins og Ludvig er í! Ludvig á einmitt svart dúnvesti þannig að þegar hitastigið verður orðið passlegt getur Hugi tileinkað sér þessa helstu tískustrauma í sænskum leikskólafatnaði!

Dagurinn fyrir afmæli Huga, 6. janúar, var auðvitað þrettándinn. Við foreldrarnir áttuðum okkur ekki á því að hér í Svíþjóð er það strangheilagur dagur og því voru engar búðir opnar þann dag. Fyrir vikið vorum við því miður ekki með neina gjöf tilbúna fyrir drenginn. Maríu fannst dálítið leiðinlegt að hann skyldi ekki fá fleiri pakka á sjálfan afmælisdaginn og fór því út í Tempo með budduna sína og keypti sjálf gjöf handa honum fyrir sinn pening! Gjöfinni var svo pakkað inn og María teiknaði Batman kort með. Það eru nú ekki allir strákar sem eiga svona ótrúlega góða stóra systur sem gefur þeim risaeðlu sem hægt er að taka sundur og setja saman aftur í afmælisgjöf! Það skal svo tekið fram að strax daginn eftir afmælið héldum við í mikinn hátíðarleiðangur til Stokkhólms þar sem ýmsir dýrgripir voru keyptir handa prinsinum sem svikinn hafði verið um gjafir á afmælisdaginn sjálfan með svona svívirðilegum hætti!

Síðdegis héldum við í afmælisferð á leikvöllinn í Stadsträdgården. Það hefur eiginlega ekki komið neinn almennilegur vetur hjá okkur enn og undanfarnar vikur hefur hitinn oft farið upp undir 10°. Í garðinum var því farið að spretta fram brum á trjágreinunum.

Skærgrænir litir vorsins sáust víða brjótast fram úr haustlitunum.

Og sumir runnar virðast aldrei hafa náð að fölna! Það var vel við hæfi að garðurinn tæki á móti afmælisstráknum í hálfgerðum vorskrúða því grænn er einmitt uppáhaldsliturinn hans Huga!

Það voru stoltir afmælisforeldrar sem fylgdust með fimm ára stráknum sínum príla og róla!

Fimm ára klifurköttur!

Einu sinni kunni þessi strákur bara að grenja og sprikla stjórnlaust út í loftið! Alveg er þetta ótrúlegt!

Afmælismamman hefur verið límd við bókina Blonde eftir Joyce Carol Oates síðustu vikur og ekki kom annað til greina en að taka hana með í garðinn. Fyrir áhugasama lestrarhesta skal þess getið að þetta er skáldsaga um ævi Marilyn Monroe, feykivel skrifuð og áhrifamikil.

Einar tók nokkrar hressar og hreyfðar rólumyndir af krökkunum meðan ég las! Hér eru systkinin á fleygiferð í stóru hengirúmsrólunni.

Hugi hlær!

Tvíhöfði!

María er nú bara eins og hún sé að lenda geimskipi á þessari mynd!

Afmælismamman sat hins vegar melankólísk á svip og fylgdist með fjörinu, kannski í nostalgíukasti að rifja upp sama dag fyrir sjö árum þegar hún fékk litla kútinn sinn í fangið í fyrsta sinn! Maður verður alltaf svo meyr á afmælisdögum barnanna!

Að lokum er svo klassískt að benda á þessa síðu með myndum af Huga nýfæddum og sætum!

Um kvöldið var herramanninum fagnað enn frekar með veislumáltíð! Á boðstólum var grjónagrautur að ósk afmælisbarnsins!!!