Sex ára afmælisveisla Huga

„Betra er seint en aldrei“ er algjörlega orðið okkar mottó í afmælishaldi! Sex ára afmælisveisla Huga var til að mynda haldin í mars þótt áfanganum hafi verið náð í byrjun janúar!

Afmæliskakan var í froskalíki að þessu sinni. Froskar skreyttu líka boðskortin sem send voru út viku fyrir veisludag eins og sænsk lög gera ráð fyrir! Ég vona að þau boðskort hafi verið ögn betur heppnuð en þau sem við sendum út í tilefni af fimm ára afmæli drengsins! Ég hugsaði mér nefnilega gott til glóðarinnar þetta árið að geta bara opnað skjalið með gamla boðskortinu, breytt dagsetningum og aldri og prentað út. Það væri nú aldeilis munur frá því í fyrra þegar ég sat sveitt við tölvuna með orðabækur og hjartapillur á víð og dreif í kringum mig og samdi sænskan texta með miklum erfiðismunum. Ég þurfti hins vegar ekki annað en að rétt renna yfir gamla boðskortið (sem ég var afar stolt af á sínum tíma!) til að komast að því að það var algjörlega ónothæft! Í þessum örfáu línum voru áreiðanlega hundrað villur!!! Lauslega þýtt á íslensku hljómaði kortið einhvern veginn svona: „Okkur langi bjóða þér í einn afmæli til Hugi, laugardagur 23. febrúar, klukkun 12-15.“ Nú skil ég ekki í því að það hafi yfir höfuð einhver mætt miðað við hversu hræðilegt boðskortið var!!! Ég leyfi mér að vona að kortið í ár hafi verið nokkurn veginn laust við villur ... að minnsta kosti þangað til það kemur að því að útbúa boðskort í sjö ára afmæli!

Froskurinn var kannski ekki alveg jafnflottur og afmæliskökurnar sem Jódís frænka hefur farið höndum um en hann var að minnsta kosti ógurlega kátur!

Og það voru afmælisbarnið og veislugestir líka! Hér eru næstum allir samankomnir við borðið að snæða pizzur sem börnin fengu að „skreyta“ sjálf eftir eigin smekk.

Hugi var að sjálfsögðu í heiðurssætinu umkringdur vinum sínum. Hann hafði reyndar mun meiri áhuga á að sýna þeim hvað hann ætti margar Star Wars spólur en að troða í sig mat! Við foreldrarnir vorum ekki alveg nógu forsjál því við hefðum auðvitað átt að fela Star Wars, Harry Potter og Pirates of the Caribbean spólurnar hans og hafa bara Bangsímon og Stubbana uppi við svo sænsku foreldarnir misstu ekki alveg allt álit á okkur!

Frá vinstri: Hugi, Teo, Olle, Anna og Signe.

Frá hægri: Hugi, Filip, Ludvig og Fabian.

Þar sem engin amma var til að aðstoða okkur í þetta skiptið neyddist María greyið til að taka á sig hlutverk hjálparhellunnar. Hún stóð sig að sjálfsögðu framúrskarandi vel og sést hér hafa vakandi auga með Ellen og Johönnu við langborðið!

Eftir að allir voru búnir að leika sér í dágóða stund (strákarnir þeyttust um húsið og slógust með sjóræningjasverðunum meðan stelpurnar flúðu lætin í þeim inn í Maríuherbergi þar sem þær léku sér afar pent og hljóðlega með dótið hennar!) var komið að afmælissöng, kertablæstri og köku.

Þrátt fyrir ítrekaðar tilraunir tókst Huga ekki að blása á eitt einasta kerti og naut að endingu aðstoðar föður síns við verkefnið!

Stóra og duglega hjálparhellan okkar að veislu lokinni! Því miður náðum við ekki að taka myndir af helsta fjörinu í veislunni, fiskidamminu, páskaeggjaleitinni og því öllu, þar sem við vorum jú upptekin við að stýra þessum fjörmiklu börnum í gegnum atburðina!

Einn besti vinur Huga, Filip, stoppaði hjá okkur í góða stund eftir að veislunni lauk og þeir félagarnir voru svo uppteknir í leik að það var með erfiðismunum að mér tókst að fá þá til að líta í myndavélina rétt á meðan þessari lokamynd úr sex ára afmælisveislu Huga var smellt af!