Nokkrar marsmyndir

Bara nokkrar myndir frá síðustu dögum! Einhverjir eru kannski alveg búnir að gleyma hvernig María og Hugi líta út?!!!

Freyja og fjölskylda komu í heimsókn til okkar í vikunni sem leið og áttum við saman notalega kvöldstund. Þegar kom að því að svæfa Bárugötuliðið fékk Ránargötudaman að vera með! Freyja hafði af þessu hina mestu skemmtun og ekki fannst Maríu og Huga síðra að fá að hafa hana með sér í kvöldlestrinum. Einar tæki sig bara nokkuð vel út sem þriggja barna faðir, er það ekki?

Einar og dömurnar lásu bókina um Litla lögreglubílinn en Hugi var sóló og las sína uppáhaldsbók þessa dagana, Mamma ertu niðri í kjallara! Bókin heitir raunar Jói fer í feluleik en Huga þykir hitt flottara enda vísar það í dramatískan hápunkt bókarinnar! Eins og sjá má er bókin lesin með tilþrifum.

Laugardagurinn 19. mars rann upp bjartur og fagur. Heimilisfaðirinn í vinnu og mamma því eftirlátssöm og gaf sleikjó!

María fékk þessa ægilega fínu kórónu daginn áður og nú hefur hún allra mestan áhuga á að vita hvort prinsessur sofi með kórónurnar sínar eða ekki! Hugi segir frá með tilþrifum ... eins og honum er lagið!

Nóvemberkaktustinn minn stendur í blóma um þessar mundir. Hann blómstrar vanalega rétt fyrir jól og rétt fyrir páska. Þar sem hann var glænýr fyrir síðustu jól komu engir knúmpar á hann þá en núna kom hann mér á óvaart og er í banastuði!

Hér er hann í öllu sínu veldi. Myndirnar hér að ofan eru sem sagt teknar undir blómin þannig að myndavélin vísar beint upp í loft. Voruð þið ekki öll einmitt að spá í hvernig hún sneri á þessum myndum?!

Að lokum verð ég að sýna ykkur gjöfina sem beið mín þegar ég kom heim úr æfingabúðunum fyrr í mánuðinum! Einar var þá búinn að kaupa handa mér þessa dásamlega sumarlegu tösku ... og ég hafði bara þurft að suða í örfáa daga!!! Hann er svo yndislegur, þessi elska ... síðustu gjafir sem ég fékk frá honum voru tvenns konar rafmagnssnúrur ... og núna þetta!!!