Jól og áramót 2007

Jólin hér á Konsulentvägen byrjuðu í raun 20. desember en þann dag komu fyrstu jólagestirnir í hús, nefnilega þau Elli og Ása. Þann dag var líka jólaskemmtun í skólanum hennar Maríu og ég held að það sé við hæfi að byrja einmitt þar í þessu ágæta jólaalbúmi!

20. desember

Þegar foreldrar og aðstandendur krakkanna í 1A í Vängeskola mættu til skemmtunarinnar tók glaðlegur músahópur á móti þeim og söng langt kvæði um jólahald músafjölskyldu. Þið þekkið auðvitað okkar konu þarna fyrir miðju!

María lék músamömmu og söng meira að segja einsöng. Það þarf varla að taka það fram að hún stóð sig með eindæmum vel og hjarta móðurinnar fylltist einu sinni enn stolti yfir litlu stóru stelpunni sinni.

Eftir músalagið voru sungnar nokkrar vísur um bókstafina og hér er það safurinn Z sem tekur á sig form á sviðinu. Að skemmtiatriðunum loknum voru kaffi og kökur í skólastofunni og loks var farið út á stóra sviðið þar sem 3. bekkur stóð fyrir skemmtiatriðum og rektor Holger hélt ræðu og flutti frumsamda vísu að vanda!

Þegar heim var komið tók við piparkökubakstur. María (enn í hlutverki!) og Hugi virða fyrir sér hið gríðarstóra safn móður sinnar af piparkökumótum og leggja línurnar!

Elli og Ása, sem höfðu lagt sig eftir flugferðina og komust því ekki með á jólaskemmtunina, risu úr rekkju fyrir baksturinn og hér eru systkinin eldhress með móðurbróður sínum!

Ása festist ekki á filmu þetta kvöld þrátt fyrir að hafa verið mjög aktíf í piparkökuútskurðinum en hér eru Elli og krakkarnir að gefa fimm í allar áttir.

21. desember

Daginn eftir voru piparkökurnar skreyttar og hér eru systkinin einbeitt að störfum.

Slatti búinn en fuuuuullt eftir!!!

Maður verður að vanda sig!

Ég sleppti Ólafi og Dorrit þetta árið og gerði Karl Gústaf Svíakonung og Silvíu drottningu í staðinn. Ekki það að þetta gæti alveg eins verið Ólafur og Dorrit!

Elli gerði þessa fínu kalla ... takið sérstaklega eftir blinginu í tönninni á þeim til hægri.

Kitch-kind eftir Huga.

Vinnugleði á Konsulentvägen!

Einar gerði þennan sem mér finnst alveg eins og annar af gömlu köllnum á svölunum í Prúðuleikurunum! Huga finnst hann hins vegar alveg eins og þjónninn hans Kolbeins kafteins úr Tinnabókunum! Svo er hann reyndar líka dálítið líkur vonda einkaþjóninum í myndinni um Hefðarkettina! Greinilega flókin, óræð og margbreytileg piparkaka þarna á ferð sem túlka má á ýmsa vegu!

Elli og Ása eiga heiðurinn að þessu frábæra pari!

22. desember

Tveimur dögum fyrir jól vorum við í óða önn við að koma heimilinu í rétt horf fyrir hátíðirnar. Hér eru feðgarnir að hjálpast að við að smíða kommóðu í hjónaherbergið sem nú er loks hætt að gegna hlutverki skrifstofu ... en það er nú eiginlega efni í heilt albúm í viðbót!

Huga fannst ekkert smá gaman að hjálpa pabba að smíða og fá að handleika verkfærin úr stóru verkfæratöskunni!

Vängepizza sá okkur fyrir kvöldmat þennan daginn enda í nógu að snúast!

Þorláksmessa

Á Þorláksmessu var tréð svo tekið inn og aftur naut Einar aðstoðar sonar síns við „smíðastörf“!

Aumingja Einari var falið að annast myndatöku meðan tréð var skreytt en í hvert sinn sem hann smellti af voru önnum kafnir jólaskreytarar horfnir úr mynd og því eigum við bara undarlegar myndir á borð við þessa af þeim viðburði sem mér þykir einna skemmtilegastur í kringum jólin!

Amma Imba hafði slegist í hópinn á Konsulentvägen þennan sama dag og fékk þann heiður að setja stjörnuna á toppinn!

Aðfangadagur

Á aðfangadegi var gjöfunum hrúgað undir tréð og við Einar lögðum lokahönd á tiltekt og þrif meðan amman galdraði fram dýrindis hamborgarhrygg og meðlæti í eldhúsinu.

Klukkan þrjú horfðum við á Kalle Anka og vini eins og góðum Svíum sæmir!

Hugi kominn úr jólabaðinu og í jólafötin, hreinn og strokinn. Þessi fína vatnsgreiðsla hélst í mesta lagi í 5 mínútur!!!

Og hér er María líka komin í sitt fínasta púss og tilbúin að taka á móti jólunum!

Borðið dekkað! Ég var svo ótrúlega heppin að mamma gaf mér þennan fína dúk, tauservéttur og servéttuhringi þannig að við gátum dúkað upp fínt jólaborð! Ég hef aldrei átt dúk á þetta borð og þaðan af síður fínerí eins og tauservéttur!!!

Fjólublátt þema á borðstofuborðinu ... ég man nú ekki alveg hvað fjólublái liturinn táknar í kirkjuárinu og krosslegg bara fingur að það sé ekki mjög í andstæðu við jólin!!!

Það var aðfangadagskvöld, fyrsta aðfangadagskvöld (á Konsulentvägen sko!) ...

Ása og Einar eitthvað að fást við mat!

Jólabörn við jólatréð tilbúin í pakkana!

María setur upp jólasveinahúfuna og útdeilir pökkum. Þetta árið þurfti hún litla sem enga hjálp við að lesa á merkimiðana og virtist meira að segja ganga ágætlega að skilja mína skrift sem mér finnst nú stundum að hljóti að jaðra við dulmál miðað við hvað mörgum gengur illa að lesa hana!

Amma og Hugi fylgjast spennt með!

Hugi tekinn við jólasveinahúfunni og nýtur aðstoðar föður síns við álestur!

María beið salíróleg eftir að það kæmi röðin að sér aftur.

Skötuhjúin Elli og Ása þykjast vera alveg róleg en geta í raun ekki beðið eftir að byrja að rífa pakkana upp!

Það komu margar góðar gjafir upp úr jólapökkunum í ár en því miður entist mér bara myndaþrek í þann fyrsta. Hér sést Hugi alsæll taka upp þrjár Star Wars myndir frá ömmu sinni Imbu.

Jóladagur

Okkur Einar vannst ekki tími til að opna jólakortin okkar fyrr en á jóladag! En vá, ég átti aldrei von á að svona margir myndu nenna að senda okkur kort hingað í útlandið! Takk innilega fyrir öllsömul, okkur þótti sko ótrúlega vænt um það!

Systkinin aðstoða við eplasalatsgerð ...

... meðan Elli sat í stofunni og velti vöngum yfir myndagátu ársins. Lausnin fannst að sjálfsögðu skömmu seinna!

Ása gaf Maríu þennan fína kjól og hárspöng í jólagjöf og því þótti tilvalið að mynda þær vinkonurnar saman við jólatréð svo fínar og sætar.

Sæti jóladrengurinn minn.

Elli og María eru góðir vinir og hér stilla þau sér saman upp við tréð.

Hangikjöt!!!

Að kvöldi jóladags spiluðum við saman bingó sem Elli var svo snjall að gefa Maríu frænku sinni í jólagjöf! Þetta var hörð barátta og komust færri að sigrinum en vildu!

Annar í jólum

Á annan í jólum héldum við fjölskyldan ásamt Imbu ömmu á jólahátíð Íslendingafélagsins hérna í Uppsölum sem haldið var í Sunnerstakirkjunni. Hér er Gunnhildur að segja krökkunum frá atburðum jólanæturinnar.

Eftir helgistundina dönsuðum við svolítið í kringum jólatréð en þá birtust allt í einu tveir jólasveinar. Eitthvað er sá á hægri hönd nú kú kunnuglegur!!!

Hugi fylgdist fullur athygli með þessum undarlegu körlum en María var öllu rólegri enda þekkir hún flestöll leyndarmál jólasveinanna út og inn!

Jú, ég er ekki frá því að ég hafi séð hann áður þennan ... hann er alla vega dálítið líkur Þórarni pabba Einars!

Krökkunum þóttu þessir jólasveinar býsna skemmtilegir en mömmu þeirra fannst vissara að fela sig rjóð í kinnum fyrir aftan myndavélina!

Eftir að heim var komið hvíldu börnin sig dálítið og horfðu á eins og eina dvd-mynd.

Amaryllisarnir mínir stóðu á hátindi ferils síns einmitt um jólin ... svo ótrúlega fallegir.

Að kvöldi annars jóladags stóðum við Einar fyrir sænsku jólahlaðborði með skinku og tilbrigði við Janssons frestelse ásamt síld og hrökkbrauði.. Daginn eftir héldu svo Ása og Elli heim en við hin dvöldum áfram á Konsulentvägen, kræktum okkur í hinar og þessar pestirnar og tókum langt og gott hlé frá myndavélinni!!!

Gamlárskvöld

Fjölskyldan sest til borðs á gamlárskvöld, prúðbúin og fín.

Í matinn var hinn heilagi kalkúni og besta máltíð ársins framundan! Feðgarnir virðast spenntir!

María var þó ekki allt of hress enda höfðu þau feðginin legið í gubbupest nóttina áður og heimasætan sá því ekki fram á að geta notið þessarar dásamlegu máltíðar til hins ýtrasta.

Semi-freddo hjarta í eftirrétt.

Einar pestarkrækir.

Eftir matinn tókum við eitt gott bingó með Huga við stjórnvölinn en hann hefur sýnt ótrúlegar framfarir í að læra að þekkja allar tölur á bilinu 1-90 eftir að spilið góða kom í hús! Við settumst svo niður og horfðum á áramótaskaupið á netinu og því fóru sænsku áramótin að mestu fram hjá okkur! Við sáum þó að sprengjugleði Svíanna er hvergi nándar nærri eins mikil og Íslendinga þrátt fyrir að hinir fyrrnefndu telji sig algjörlega flugeldaóða þjóð!!!

Gleðilegt nýtt ár kæru vinir!