Aðventukrans 2007

Eins og lög gera ráð fyrir var aðventukrans heimilisins föndraður laust eftir miðnætti aðfaranótt fyrsta sunnudags í aðventu. Hvers vegna okkur tekst aldrei að vera örlítið fyrr á ferðinni er mér hulin ráðgáta!

Kransagerðina er ég búin að vera að undirbúa síðastliðna viku. Það þarf auðvitað að kaupa greni og kerti, útvega skreytingar eftir smekk hverju sinni og svo er algjörlega ómissandi að eiga smá jólabjór í kæli.

Eins og allir vita skiptir allra mestu máli þegar jólabjórinn er keyptur að velja þann sem er í fínustu umbúðunum. Mér þótti þessi sænski tomte með jólagraut og ölkrús agalega fínn!

Við erum orðin svo ótrúlega góð í þessu eftir margra ára þjálfun að við vorum næstum búin að hnýta allan kransinn þegar við mundum eftir að taka myndir af ferlinu. Hér er ég að leggja lokahönd á verkið, harla glöð með árangurinn.

Handavinna.

Jólabjórinn hálfnaður og grenið klippt og skorið.

Einar spæjar út hvernig best sé að festa kertin.

Við kynnum ... Aðventukransinn 2007!!!

Ég var harðákveðin í því að skreyta kertin með þessum fínu hjartatölum og fallegum borða og eyddi stórum hluta úr síðustu viku í að þramma um miðbæinn og keyra í hinar ýmsu gróðurstöðvar í leit að einhverju skrauti sem gæti verið fallegt með. Keypti að minnsta kosti tvennt sem ég hugðist skreyta kransinn sjálfan með. En þegar til kastanna kom fannst mér grenið sjálft og laufið svo ótrúlega fallegt að mig langaði ekki að fara að hrúga á það einhverjum berjum og dóti. Svo fannst mér líka tölurnar og borðarnir svo fínir og í sjálfu sér alveg nógu mikið punt. Held að þetta hefði Bara orðið aðeins of mikið Barbara Cartland ef ég hefði farið að troða meiru á hann!

Grenið sjálft er ansi litskrúðugt ... eða ég veit nú ekki alveg hvort maður kallar svona sýprusvið greni!

Finnst ykkur litlu könglarnir á sýprusnum ekki dálítið krúttlegir? Það finnst okkur Einari alla vega.

Fyrsta kertið er klárt í slaginn!

Fyrsti sunnudagur í aðventu runninn upp og systkinin María og Hugi bíða spennt eftir að kveikt sé á fyrsta kertinu.

Við kveikjum einu kerti á, hans koma nálgast fer, sem fyrstu jól í jötu lá, og Jesúbarnið er.

Yndisleg systkini á yndislegum degi!