Aðventukrans 2006

Eins og flestir lesendur síðunnar vita sjálfsagt nú orðið er það hefð hjá okkur hjónaleysunum að hnýta aðventukrans aðfaranótt fyrsta sunnudags í aðventu ... þetta hefur víst verið margtuggið hér á síðunni!!! Í ár vorum við með gest einmitt þetta kvöld og ekki nóg með það heldur sat ég með gestinum á veitingahúsi í Stokkhólmi einmitt á þeim tíma sem kransagerð hefði átt að hefjast undir eðlilegum kringumstæðum! Föndrinu var því frestað um tvo daga en að kvöldi 4. desember var hafist handa um leið og börnin voru komin í rúmið! Við viljum nefnilega enn halda í það að hafa þetta kærustuparasið!

Þegar mynda átti kransinn í miðjum klíðum kom í ljós að vélin var batteríislaus. Þar sem það tók sinn tíma að hlaða hana eru því miður bara til myndir af tilbúnum kransi! Þið verðið bara að trúa mér þegar ég segi án sannana að það var allt samkvæmt venju: tangir, vír, jólabjór og greniilmur!

Eina skrautið sem við notuðum í ár voru þessi ponsulitlu epli sem við klipptum af stórri grein. Þar sem grenið var eitthvað svo „lifandi“ og náttúrulegt fannst okkur ekki við hæfi að fara að troða einhverju gervidrasli á kransinn og því urðu smáeplin fyrir valinu þótt okkur þyki skrautið sem við notuðum í fyrra enn dásamlega fallegt!

Hér í Uppsölum var ekki boðið upp á það greni sem við erum vön að nota, í staðinn keyptum við silkimjúka furu og svo dálítið undarlegar greinar með áföstum könglum á ýmsum vaxtarstigum.

Ég var ekkert allt of ánægð með kransinn í fyrstu, fundust þessi könglar eitthvað pínu mis og svona aðeins of hefðbundnir (vantaði bara sveppi á grein!)... en þar sem þeir uxu á greinunum fannst mér ekki við hæfi að tína þá af og auk þess gáfu þeir kransinum óneitanlega dálítið lífrænan svip! Núna er ég hins vegar sífellt að verða ánægðari með kransinn minn! Ekki síst þegar ég opna útidyrahurðina og dásamlegur greniilmurinn tekur á móti mér! Nú eða þegar ég sit við kertaljósið eina með kaffibollann minn!

Búið að kveikja á fyrsta kertinu! Ég spyr eins og undanfarin ár: Heitir það ekki spádómskerti?!

Hér er kransinn á borðstofuborðinu og nýja borðstofuljósið hangir yfir!

Þetta er svo frekt borðstofuljós að það tróð sér inn á aðventukransasíðuna!!!

Til að bæta upp fyrir myndafæðina í ár smelli ég inn hlekkjum á fyrri aðventukransasíður!

Aðventukransinn 2005

Aðventukransinn 2004

Aðventukransinn 2003